ქათმის რულეტი "ალა იტალიანო"

ერთ-ერთი საუკეთესო რამ, რაც შეგიძლიათ უქნათ ქათმის ფილეს, არის მისი გატენვა განსხვავებული გულსართით. ფილეს არომატიც აკლია და გემოც, ამიტომ მზეზე გამომშრალი პომიდორი, მოცარელა და პროშუტო, გაამდიდრებს და გააცოცხლებს ფილეს. მოცარელას მაგივრად შეგიძლიათ სულგუნიც გამოიყენოთ, პროშუტოს ნაცვლად კი ნედლად შებოლილი ბეკონი.

უხდება

ტარხუნის ლიმონათი

რეცეპტის ავტორი

ლუკა ნაჭყებია

ინგრედიენტები

ულუფა :

ქათმის ფილე

3 ცალი

პროშუტო

500 გრამი

თხელად დაჭრილი მოცარელა

100 გრამი

გარგრის ჩირი

50 გრამი

ქიშმიში

20 გრამი

ვაშლი

50 გრამი

ისპანახი

50 გრამი

შაშკვლავი

15 გრამი

მჟაუნა

40 გრამი

მზეზე გამომშრალი პომიდორი

70 გრამი

ნაღები

120 მილილიტრი

ნიორი

5 გრამი

თეთრი მშრალი ღვინო

100 მილილიტრი

საფეხური

ქათმის ფილე გავჭრათ ცენტრში, ისე, რომ გაიხსნას და პეპელის ფორმა მიიღოს. მოვათავსოთ დაფაზე, გადავაკრათ გრინი და ჩაქუჩით მსუბუქად გავაბრტყელოთ. გაბრტყელებულ ფილეს მოვაყაროთ მარილი და პილპილი. შემდეგ, მთელი ფილეს სიგანეზე ჩავაფინოთ თხლად დაჭრილი პროშუტო, თხლად დაჭრილი მოცარელა (ნახევარი ჯამური მასის) და ბოლოს მზეზე გამშრალი პომიდორი. ფილე რულეტივით დავახვიოთ და კანფეტივით გავახვიოთ გრინში, ბოლოები გავკვანძოთ და მოვხარშოთ მდუღარე წყალში 15 წუთის განმავლობაში.

საფეხური

პარალელურად, 2 ცალი გამოშრალი პომიდორი დავჭრათ წვრილ ნაჭრებად, გარგრის ჩირი და ქიშმიშიც იმავე ზომაზე დავჭრათ. ისპანახი, მჟაუნა, ვაშლი და შაშკვლავი დავჭრათ წვრილ ფირფიტებად, ვაშლს მოვასხათ ლიმონის წვენი, რომ არ დაჟანგდეს. ყველა ინგრიდიენტი ავურიოთ, რომ მივიღოთ სალათი.

საფეხური

მოხარშული რულეტი ამოვიღოთ წყლიდან, მოვაშოროთ გრინი, მოვაყაროთ მარილი და ამოვავლოთ ფქვილში. გავაცხელოთ ტაფა, ჩავასხათ ზეთი და დავბრაწოთ გაოქროსფრებამდე.

საფეხური

სოუსისთვის დავსრისოთ და დავჭრათ ნიორი, ჩავყაროთ ტაფაში, დავასხათ ღვინო და მოვთუშოთ. როდესაც ღვინის მესამედი აორთქლდება დავამატოთ ნაღები, აქტიურად ვურიოთ, ისე, რომ ნაღები არ აიჭრას. ნაღების წამოდუღების შემდეგ ჩავხეხოთ დარჩენილი ყველი.

სერვირება

გაოქროსფრებული ფილე დავჭრათ მედალიონებად, მოვასხათ სოუსი და მივაყოლოთ სალათი.

Comments