თაშმიჯაბი - სვანური ელარჯი

სასურველია, სვანური ელარჯისთვის, კარტოფილიც სვანური იყოს, მოწითალო ფერის კანით, რომელიც უფრო ფხვიერია.

მოხარშული კარტოფილი გაატარეთ ხორცის საკეპ მანქანაში, ან კარგად ჩაზილეთ, (უკეთესია თუ ცხელს გაფრცქვნით და ჩაზელთ) სქელძირიან ქვაბში ჩაასხით რძე ან წყალი და ჩაამატეთ კარტოფილი, ხის კოვზით მოურიეთ მანამ, სანამ ერთიანი მასა არ გახდება. კარგად რომ გაცხელდება, ჩააზილეთ ყველი.

როგორც კი ყველი დნობასა და გაწელვას დაიწყებს გადმოდგით, შეაზავეთ მარილით და რომელიმე სხვა სასურველი სუნელით (სვანური მარილი ან ქონდარი) მიირთვით ცხელი. (სვანეთში ამ კერძს აუცილებლად ახლად ამოყვანილი, 1 ან 2 დღის ყველით აკეთებენ).

თუ ამ კერძს სახლში ამზადებთ, უკეთესია, თუ მას ქვაბიდან სასწრაფოდ თეფშზე გადაიტანთ და ასევე სწრაფად მიირთმევთ, რომ არ გაცივდეს.

თუ ორიგინალურად გინდათ მისი სერვირება, მაშინ შეგიძლიათ ბურთულები გააკეთოთ, უბრალოდ, ამ შემთხვევაში ტემპერატურა დაიკლებს და ყველი ისეთი წელვადი აღარ იქნება, როგორც თავიდან.